မြန်မာနိုင်ငံတွင် သုံးစွဲသူ ၂၃ သန်းကျော်ရှိပြီး လူသုံးအများဆုံး ဆက်သွယ်ရေးကုမ္ပကြီး ဖြစ်သည့် တယ်လီနောသည် သုံးစွဲသူများ၏ အချက်အလက်များကို အာဏသိမ်းစစ်ကောင်စီထံသို့ ပေးပို့ခဲ့သည်။
အထူးသဖြင့် ကြိုးပေးခံခဲ့ရသည့် နွေဦးတော်လှန်ရေး ခေါင်းဆောင်များ ဖြစ်သည့် ကိုဂျင်မီနှင့် ကိုဖြိုးဇေယျာသော်တို့၏ ဆက်သွယ်ရေး ဒေတာအချက်အလက်များအား စစ်ကောင်စီထံ ပေးအပ်ခဲ့သည်။
ထိုကြောင့် တယ်လီနောနှင့် တယ်လီနော မြန်မာ စီမံခန့်ခွဲမှုအဖွဲ့အား ၂၀၁၈ ခုနှစ်မှ ၂၀၂၂ ခုနှစ် အတွင်း နော်ဝေ ဒဏ်ခတ်ပိတ်ဆို့မှုများအား ချိုးဖောက်ခြင်းအတွက် နော်ဝေရဲတပ်ဖွဲ့ထံတွင် ၂၀၂၄ ခုနှစ် ဒီဇင်ဘာတွင် တိုင်ချက်ဖွင့်ခဲ့သည်ဟု Justice For Myanmarမှ ထုတ်ပြန်သည်။
အဆိုပါ တိုင်ကြားမှုအား Justice For Myanmar နှင့် ICJ Norway တို့ ပူးပေါင်းတိုင်ကြားခဲ့ခြင်း ဖြစ်သည်။
ICJ Norway ၏ ဘုတ်အဖွဲ့အကြီးအကဲ Terje Einarsen က “နော်ဝေနဲ့ အခြား အနောက်နိုင်ငံတွေ အနေနဲ့ လူ့အခွင့်အရေးနဲ့ လူသားချင်းစာနာထောက်ထားမှုဥပဒေတွေအပါအဝင် နိုင်ငံတကာဥပဒေကို လေးစားလိုက်နာမှုမြှင့််တင်ဖို့၊ အပြစ်ပေးအရေးယူခံရမှုကနေ ကင်းလွတ်နေတာကို တိုက်ဖျက်ဖို့ အတွက် လူပုဂ္ဂိုလ်တစ်ဦးချင်းအပေါ် ပစ်မှတ်ထား ဒဏ်ခတ်ပိတ်ဆို့မှုတွေနဲ့ နယ်ပယ်အလိုက် ဒဏ်ခတ်ပိတ်ဆို့မှုတွေ တိုးမြှင့်အသုံးပြုနေချိန်မှာ အခုတိုင်ကြားချက်က အများပြည်သူအတွက် အကျိုးရှိမှာ ဖြစ်ပါတယ်။ ရဲတပ်ဖွဲ့အနေနဲ့ မြန်မာဒဏ်ခတ်ပိတ်ဆို့မှုတွေကို တယ်လီနောအုပ်စု ချိုးဖောက်မှုရှိမရှိ စုံစမ်းဖော်ထုတ်ရမှာ ဖြစ်ပါတယ်” ဟု ပြောကြားခဲ့သည်။
တယ်လီနောမြန်မာသည် အာဏာစတင်သိမ်းခဲ့သည့် ၂၀၂၁ ဖေဖော်ဝါရီ ၁ ရက်တွင် မြန်မာအစိုးရ စောင့်ကြည့် ထောက်လှမ်းရေစင်တာနှင့် ဆက်နွယ်သည့် ဒဏ်ခတ်ပိတ်ဆို့ထားသည့် စောင့်ကြည့်ရေး ထောက်လှမ်းရေး စက်ပစ္စည်းများကို တပ်ဆပ်ခြင်း၊ တည်ဆောက်ခြင်းနှင့် ထိန်းသိမ်းခြင်းများအား စစ်ကောင်စီ အတွက် လုပ်ဆောင်ပေးခဲ့သည်။
ထို့အပြင် တယ်လီနောသည့် ဖုန်းကဒ် အသုံးပြုသူများ အန္တရာယ် ကျရောက်နိုင်သည့် အချက်အလက်များကို စစ်ကောင်စီထံသို့ လွှဲပြောင်းပေးခဲ့သည်။
“တယ်လီနောဟာ ကိုဂျင်မီနဲ့ ကိုဖြိုးဇေယျာသော်တို့ ကွပ်မျက်ခံရမှုမှာ တရားမ၀င်အကြမ်းဖက်စစ်အုပ်စုဆီ ကိုယ်ရေးကိုယ်တာ အချက်အလက်တွေကို သိသိကြီးနဲ့ ပေးအပ်ခဲ့တဲ့ ကုမ္ပဏီရဲ့လုပ်ရပ်တွေအပါအဝင် လူသားမျိုးနွယ် အပေါ် ကျူးလွန်တဲ့ ရာဇ၀တ်မှုတွေမှာ ကူညီဆောင်ရွက်ပေးခဲ့တဲ့ ကိစ္စတွေမှာလည်း ပြည့်ပြည့်စုံစုံ စုံစမ်းစစ်ဆေးဖို့လိုပါတယ် “ဟု Justice For Myanmar မှ ပြောရေးဆိုခွင့်ရှိသူ မရတနာမောင်က ပြောသည်။
ထိုကြောင့် တယ်လီနော အနေဖြင့် မြန်မာဒဏ်ခတ်ပိတ်ဆို့မှုများကို ချိုးဖောက်မှုများအတွက် နော်ဝေရဲတပ်ဖွဲ့ထံတွင် စုံစမ်းစစ်ဆေးခံရမည် ဖြစ်သည်။
လက်ရှိ နော်ဝေရဲတပ်ဖွဲ့ထံသို့ များပြားလှသည့် သက်သေအထောက်များဖြစ်သည့် တယ်လီနောထံမှ စာရွက်စာတမ်းများ၊ မြန်မာ့ဆက်သွယ်ရေး အာဏာပိုင်များနှင့် အပြန်အလှန်ပေးစားများ ပါဝင်သည်။
ထို့အပြင် ဟွာဝေး၏ အကျိုးဆောင်မှုဖြင့် ဂျာမဏီကုမ္ပဏီ Utimaco GmbH ထံမှ ၂၀၁၇ ခုနှစ်၊ နိုဝင်ဘာလတွင် တရားဝင်ကြားဖြတ်စောင့်ကြည့်ဂိတ်ဝေး Lawful Interception Gateway (‘LIG’) ကို ဝယ်ယူခဲ့ပြီး ၂၀၁၈ ခုနှစ် ဖေဖော်ဝါရီလတွင် မြန်မာနိုင်ငံသို့ ပေးပို့ခဲ့သည်။
လက်ရှိ တိုင်ကြားချက်နှင့် ပတ်သက်၍ တယ်လီနောအနေဖြင့် နော်ဝေ၏ ဒဏ်ခတ်ပိတ်ဆို့မှုများအား ချိုးဖောက်ခဲ့ပါက တရားရုံးရှေ့မှောက်တွင် တာဝန်ခံရမည်ဟု ICJ Norway နှင့် Justice For Myanmar တို့မှ အဆိုပါ ထုတ်ပြန်ချက်တွင် ဖော်ပြထားသည်။
