နှစ်နိုင်ငံပဋိပက္ခဖြစ်ခြင်းကြောင့် ထိုင်းနိုင်ငံတွင် အလုပ်လုပ်ကိုင်နေသည့် ကမ္ဘောဒီးယားနိုင်ငံသား ရွှေ့ပြောင်းအလုပ်သမား ၅၀၀၀ ကျော်က ချန်ထဘူရီစစ်ဆေးဂိတ်က တစ်ဆင့် ၎င်းတို့၏ နိုင်ငံသို့ ပြန်လည်ထွက်ခွာသွားသည်ဟု Khaosod ထိုင်းသတင်းဌာနက ဖော်ပြထားသည်။
ယင်းသို့ ကမ္ဘောဒီးယားနိုင်ငံသား ရွှေ့ပြောင်းအလုပ်သမားများ ၎င်းတို့၏ နိုင်ငံသို့ ထွက်ခွာနိုင်ရန် ချန်ထဘူရီစစ်ဆေးဂိတ်အား ဖွင့်လှစ်ပေးထားသည်ဟု ဆိုသည်။
လက်ရှိထိုင်းနိုင်ငံ၏ စက်ရုံအလုပ်ရုံတွင် အလုပ်လုပ်ကိုင်နေသည့် ကမ္ဘောဒီးယားနိုင်ငံသား ၅ သိန်းအထိ ရှိသည်ဟု ထိုင်းသတင်းဌာနများ၏ ဖော်ပြချက်အရသိရသည်။
နယ်မြေအငြင်းပွားမှု ဖြစ်ပွားနေသည့် ထိုင်း-ကမ္ဘောဒီးယား နယ်စပ်တွင် ယနေ့တွင်လည်း တိုက်ခိုက်မှုများ ဆက်တိုက်ဖြစ်ပွားလျှက်ရှိပြီး ကမ္ဘောဒီးယားနိုင်ငံသား ၂၄ ဦးသေဆုံးခဲ့သည်ဟု ထိုင်းသတင်းဌာနများမှ ဖော်ပြထားသည်။
ယင်းအပြင် ကမ္ဘောဒီးယားနိုင်ငံမှ ၁၀၀ မီလီမီတာ အမြောက် သုံးခုနှင့် တင့်ကား နှစ်စီးဖြင့် ထိုင်းဘက်ခြမ်း သို့ လက်နက်ကြီးများ ပစ်ခတ်လျက်ရှိသည်ဟု ဆိုသည်။
ထိုင်း-ကမ္ဘောဒီးယားနယ်စပ်တစ်လျှောက် Ubon Ratchathani ပြည်နယ်ရှိ Chong Bok နှင့် Phu Makhuea ဒေသများ နှင့် Surin ပြည်နယ်ရှိ Phanom Dong Rak ခရိုင် တို့တွင်လည်း နံနက် ၄ နာရီခန့်မှစ၍ တိုက်ပွဲများ စတင်ခဲ့ဖြစ်ပွားခဲ့သည်ဟု သိရသည်။
ထိုသို့ နှစ်နိုင်ငံ နယ်စပ်ကြားတိုက်ပွဲများ ပြင်းထန်နေခြင်းကြောင့် ဘူရီရမ်ယူနိုက်တက် (Buriram United) ကလပ်ဥက္ကဋ္ဌ Nevin Chidchob သည် ထိုင်း-ခကမ္ဘောဒီးယား နယ်စပ်စစ်ပွဲကြောင့် ထွက်ပြေးလာရသည့် စစ်ဘေးရှောင်များအား ထောက်ပံ့ကူညီရန်အတွက် Chang International Circuit နှင့် Lanob Chang. Buriram တို့ကို ဗဟိုဌာနအဖြစ် ဖွင့်လှစ်လိုက်ပြီဖြစ်သည်ဟု ထိုင်းသတင်းဌာနများတွင် ဖော်ပြထားသည်။
#ထိုင်း #ကမ္ဘောဒီးယား #ရွှေ့ပြောင်းအလုပ်သမား #ThanLwinKhetNews
