မောင်လှိုင်း
ရှမ်းပြည်နယ်မြောက်ပိုင်း၊ လားရှိုးမြို့အား ထိန်းချုပ်ထားသည့် ကိုးကန့်တပ် MNDAA ၂၀၂၅ ခုနှစ် ဧပြီလ ၂၁ ရက်နေ့တွင် ပြန်လည်ဆုတ်ခွာမည်ဟု MNDAA နှင့်နီးစပ်သည့် စစ်ရေးသတင်း အရင်းအမြစ်များထံမှ သိရသည်။
ကိုးကန့်တပ် MNDAA မှ ကျန်းမားရေးဌာနနှင့် ပညာရေးဌာနများမှ တပ်ဖွဲ့ဝင်များ ကနဦး တပ်ဆုတ်ခွာမည် ဖြစ်သည်ဟု MNDAA နှင့်နီးစပ်သည့် စစ်ရေးသတင်းအရင်းအမြစ်တဦးကပြောသည်။
“စကစ ဖက်က လဝက(လူဝင်မှုကြီးကြပ်ရေး)၊ပညာရေး၊ကျန်းမာရေး လမကုန်ခင် ပြန်ဝင်မှာ ကျန်ခဲ့မှာကတော့ စစ်ဦးစီးချုပ်နဲ့ တပ်ဖွဲ့ဝင်တွေကျန်ခဲ့မယ်။ ရဲဌာနလည်းကျန်ခဲ့မယ်။ ပြီးတော့ ပြည်သူ့ဆက်ဆံရေးဌာန လည်းကျန်ခဲ့မယ်” ၎င်းက ပြောသည်။
တရုတ်နိုင်ငံဘက်မှ ထိန်းသိမ်းထားသည်ဟု သတင်းများထွက်ပေါ်နေခဲ့သည့် ကိုးကန့်တပ်-MNDAAခေါင်းဆောင် ဖုန်တာရွင်သည် ဧပြီလ ၂ ရက်နေ့တွင် အထူးဒေသ(၁)တွင် ပြုလုပ်သော ငလျင်ကူညီကယ်ဆယ်ရေးရန်ပုံငွေလှူ ဒါန်းပွဲ၌ လူမြင်ကွင်းသို့ ထွက်လာပြီးနောက်တွင် လားရှိုးမြို့မှ ကိုးကန့်တပ် ဆုတ်ခွာမည့် သတင်းများအား တပ်နှင့် နီးစပ်သူများမှ အတည်ပြုလိုက်ခြင်းဖြစ်သည်။
လားရှိုးမြို့ကို ကိုးကန့်တပ် MNDAA မှ ပြီးခဲ့သည့်နှစ်လယ်ပိုင်းတွင် သိမ်းပိုက်ထားပြီး ခြောက်လကျော်ကြာ MNDAA ၏ အုပ်ချုပ်ရေးယန္တရားများဖြင့် လည်ပတ်ခဲ့သည်။
ထို့နောက် စစ်ကောင်စီနှင့် MNDAA တို့သည် တရုတ်၏ ကြားဝင်ညှိနှိုင်းမှုကြောင့် ပြီးခဲ့သည့် ဇန်နဝါရီလ ၁၆နှင့် ၁၇ ရက်တို့တွင် တရုတ်နိုင်ငံ ယူနန်မြို့တွင် တွေ့ဆုံဆွေးနွေးခဲ့ပြီးနောက် အပစ်ရပ်ရန် သဘောတူခဲ့ သည်ဟု တရုတ်နိုင်ငံဘက်မှ ကြေညာထားသည်။
သို့သော် အဆိုပါ သဘောတူညီချက်အား စစ်ကောင်စီနှင့် MNDAA ဘက်မှ MNDAAတပ်များ ဆုတ်ခွာမည်ဟု သတင်းများထွက်ပေါ်နေသည့်တိုင်အောင် ယနေ့အချိန်ထိ ထုတ်ပြန်ခြင်းမရှိသေးပေ။
တရုတ်နိုင်ငံသည် ကိုးကန့်တပ်မှ လားရှိုးမြို့အား သိမ်းပိုက်ပြီးနောက် ကိုးကန့်ကိုယ်ပိုင် အုပ်ချုပ်ခွင့်ရ ဒေသများနှင့် သိမ်းပိုက်နယ်မြေများသို့ လောင်စာဆီ၊ အစားအသောက်နှင့် ဆေးဝါးများကို ‘ဝ’ နှင့် နယ်စပ်ဂိတ်များမှ သယ်ယူခွင့်ပိတ်ပင်ခဲ့သည်။
တရုတ်နယ်စပ်မှ စတင်ခဲ့သည့် ၁၀၂၇ ပထမပိုင်းနှင့် ဒုတိယပိုင်းတို့တွင် ကိုးကန့်တပ် MNDAAမှ တရုတ်နိုင်ငံနှင့် ထိစပ်နေသည့်မြို့များနှင့် လားရှိုးအပါအဝင် မြို့ပေါင်း ၁၃ မြို့ကို စစ်ကောင်စီထံမှ သိမ်းယူခဲ့သည်။
၎င်းတို့ထဲမှ ဟိုပန်နှင့် ပန်လုံမြို့များကို ‘ဝ’ပြည်သွေးစည်းညီညွတ်ရေးတပ်မတော်(UWSA) ထံလွှဲပြောင်းပေးခဲ့သည်။
