မောင်လှိုင်း
ငလျင်ကြောင့် ထိခိုက်ဒဏ်ရာရရှိသူ လူနာအရေအတွက်သည် မန္တလေးဆေးရုံကြီးတွင် လက်ခံနိုင်သည့် အရေအတွက်ထက် ကျော်လွန်နေခြင်းကြောင့် ကျောက်ကပ်ဆေးမည့် လူနာများအား ကုသပေးနိုင်ခြင်း မရှိသည့်အတွက် အခက်အခဲဖြင့် ရင်ဆိုင်နေရသည်ဟု မန္တလေးမြို့မှ အသက် ၃၁ နှစ်အရွယ် အမျိုးသားတစ်ဦးက ပြောသည်။
အဆိုပါ အမျိုးသား၏ မိခင်မှာ ကျောက်ကပ် ဆေးနေရသူ တစ်ဦးဖြစ်ပြီး ပုဂ္ဂလိကဆေးခန်းဖြစ်သည့် မေတ္တာမွန်ဆေးရုံတွင်လည်း ကျောက်ကပ်ဌာနအား ပိတ်ထားခြင်းကြောင့် ကျောက်ကပ်ဆေးရန် အခက်ကြုံနေရသည်ဟု သိရသည်။
“ကျောက်ကပ်ဆေးမယ့် သူတွေ ဆေးမရတော့ဘူး။ ဆေးရုံက ရေပြတ်မီးပြတ်ဖြစ်နေလို့။ ပြိုနေတာလည်း ပါတယ်။ ကျောက်ကပ်ဆေးပေးနေတဲ့ ခေတ်မြတ်နိုးဆေးခန်းက လကုန်ထိ Booking (စာရင်းပေးသွင်းသူ) တွေနဲ့ ပြည့်နေပြီ” ဟု ၎င်းကပြောသည်။
လက်ရှိတွင် မန္တလေးဆေးရုံကြီး၌ ငလျင်ဒဏ်ခံရသည့် လူနာများဖြင့် ပြည့်နေခြင်းကြောင့် ကျောက်ကပ်ဆေးမည့် လူနာများအား ဆေးပေးနိုင်ခြင်းမရှိသေးသလို မေတ္တာမွန်ဆေးရုံရှိ ကျောက်ကပ်ဌာနသည်လည်း ပိတ်ထားခြင်းကြောင့် အဆိုပါ အမျိုးသား၏ မိခင်မှာ နေအိမ်တွင် ဆေးကုသခွင့်မရဘဲ နေထိုင်နေရသည်ဟု သိရသည်။
ယင်းအခြေအနေနဲ့ ပတ်သက်၍ ၎င်းက “ခုလို ကျောက်ကပ်မဆေးရတဲ့အခါကျ သူအရမ်းနာနေရှာတာ”ဟု ပြောသည်။
ငလျင်ဒဏ်ကြောင့် အထိအခိုက်ပျက်အစီးများခဲ့သည့် မန္တလေးမြို့ရှိ ဆေးရုံနှင့် ဆေးခန်းများတွင် လူနာများ အလွန်များပြားလျက်ရှိသည်။
လက်ရှိတွင် မန္တလေးမြို့မှ ကျောက်ကပ်ဆေးမည့်လူနာများသည် ပြင်ဦးလွင်သို့ သွားရောက်၍ ဆေးကုသနေရသည်ဟု ကျောက်ကပ်ဆေးမည့် မိသားစုဝင်များထံမှသိရသည်။
မတ်လ ၂၈ ရက် မွန်းလွဲပိုင်းတွင် ရစ်(ချ်)တာစကေး ၇.၇ အင်အားပြင်းငလျင်ဒဏ်ကြောင့် မန္တလေး၊ စစ်ကိုင်း၊ အမရပူရ၊ အင်းလေး၊ တောင်ငူ၊ အောင်ပန်းအပါအဝင် မြို့ကြီးများတွင်အဆောက်အအုံများ ပြိုကျခဲ့ပြီး လူသေဆုံးမှုမှာလည်း ဧပြီ ၁ ရက်အထိ ၄၂၀၀ ကျော်အထိ ရှိလာသည်ဟု အမျိုးသားညီညွှတ်ရေး အတိုင်ပင်ခံကောင်စီမှ ထုတ်ပြန်ထားသည်။
ပုံစာ- ငလျင်ဒဏ်ကြောင့် ပိတ်ထားသည့် မန္တလေးမြို့ရှိ သံဃာ့ဆေးရုံ။
