စစ်ကောင်စီတပ်၏ လေကြောင်းတိုက်ခိုက်မှုကြောင့် ကေအဲန်ယူ – ကရင်အမျိုးသားအစည်းအရုံး KNU ထိန်းချုပ်နယ်မြေ၊ ဒူးပလာယာခရိုင်၊ ကော့ကရိတ်မြို့နယ်၊တဘလုခို့ခီးကျေးရွာက ဒေသခံ
နှစ်ဦးသေဆုံးခဲ့ သည်ဟု KNU က ယနေ့တွင်ထုတ်ပြန်သည်။
မတ်လ ၁၉ ရက်၊ နေ့လည် ၁၁ နာရီခွဲအချိန်တွင်စစ်ကောင်စီ၏ နေပြည်တော်လေတပ်မှ Yak-130 Jet Fighter တစ်စီးဖြင့် တဘလုခို့ခီးကျေးရွာသို့ တိုက်ပွဲ ဖြစ်ပွါးခြင်းမရှိဘဲ လာရောက် ဗုံးကြဲပစ်ခတ်ခဲ့သည်။
ဗုံးကြဲပစ်ခတ်မှုကြောင့် တဘလုခို့ခီးကျေးရွာနေ အသက်(၃၆) နှစ်အရွယ်ရှိ အမျိုးသားတစ်ဦး နှင့် အသက် (၃၀) နှစ် အရွယ်ရှိ အမျိုးသားတစ်ဦးတို့ သည် သေဆုံးခဲ့ပြီး နေအိမ်တလုံး နှင့် ဂိုဒေါင်တစ်လုံး ပျက်ဆီးဆုံးရှုံးခဲ့သည်ဟု KNU ၏ ထုတ်ပြန်ချက်အရသိရသည်။
စစ်ကောင်စီတပ်သည် စစ်ရေးပစ်မှတ်မဟုတ်သည့် ဘာသာရေးအဆောက်အဦများ၊ ပြည်သူ့ဆေးရုံ ဆေးခန်းများ၊ စာသင်ကျောင်းများနှင့် အရပ်သားပြည်သူနေထိုင်သည့်နေရာများအား ပစ်မှတ်ထားကာ လိုက်လံဗုံးကြဲပစ်ခတ်လျှက်ရှိသည်ဟု KNU ကထုတ်ပြန်ထားသည်။
ပုံစာ – စစ်ကောင်စီတပ်၏ လေကြောင်းတိုက်ခိုက်မှုကြောင့် သေဆုံးသွားသောပြည်သူများ နှင့် ပြည်သူပိုင်အဆောက်အဦများ
