သံလွင်ခက်
ဒီဇင်ဘာ ၂၈၊ ၂၀၂၄။
ချင်းပြည်နယ် တောင်ပိုင်း၊ မင်းတပ်မြို့သိမ်း တိုက်ပွဲတွင် ချင်းညီနောင် တပ်ဖွဲ့နှင့် မဟာမိတ်အဖြစ် ပူးပေါင်းပါဝင်ခဲ့သည့် မုံရွာခရိုင်အမှတ် ၃ တပ်ရင်းက၊ ရဲဘော် ၇ ဦး တိုက်ပွဲအတွင်း ကျဆုံးခဲ့သည်ဟု ကာကွယ်ရေးတပ်ဖွဲ့ဝင်ထံက သိရသည်။
တိုက်ပွဲတွင် မုံရွာခရိုင် အမှတ် ၃ တပ်ရင်း၊ တပ်ခွဲ ၂ က အသက် ၁၉ နှစ်အရွယ် ရဲဘော် ၂ ဦးအပါအဝင် တပ်ရင်းက ၅ ဦး ကျဆုံးခဲ့ပြီး ခြေထောက်ဖြတ်တောက်ခဲ့ရသည့် ရဲဘော် ၂ ဦးနှင့် မျက်လုံး တစ်ဖက် ထိခိုက်သည့် ရဲဘော် ၁ ဦး ရှိသည်ဟု မုံရွာခရိုင် အမှတ် ၃ တပ်ရင်း၊ တပ်ခွဲ ၂ Mahauurar Dragon PDF အဖွဲ့ ၏ ဘဏ္ဏာရေးမှူးက သံလွင်ခက်ကို ပြောသည်။
“စစ်ကောင်စီ အမြစ်ပြတ်ချေမှုန်းရေးအတွက် မဟာမိတ်ညီနောင်အဖြစ် ပါဝင်တိုက်ခိုက်ခဲ့တာပါ” ဟု ပြောသည်။
ထို့ပြင်တိုက်ပွဲအတွင်း ထိခိုက်ဒဏ်ရာရရှိသူ ၉ ဦး ရှိခဲ့ပြီး ဆေးဝါး ကုသမှု ခံယူလျက်ရှိသည်ဟု ၎င်းက ဆက်ပြောသည်။
မင်းတပ်မြို့သိမ်းတိုက်ပွဲကို ချင်းညီနောင်တပ်ဖွဲ့ – Chin Brotherhood နှင့်အတူ မုံရွာခရိုင် အမှတ် ၃ တပ်ရင်း အပါအဝင် ယောဒေသတော်လှန်ရေးတပ် Yaw Defence Force – YDF၊ Yaw Army – YA တို့ ပူးပေါင်းပါဝင်တိုက်ခိုက်ခဲ့ကြပြီး အာရက္ခတပ်တော် – AA က စစ်ကူ၊ စစ်လက်နက်၊ ခဲယမ်းများနှင့် စစ်ရေးဆိုင်ရာ အကြံဉာဏ်များ ပံ့ပိုးပေးခဲ့သည်ဟုလည်း သိရသည်။
မင်းတပ်မြို့တွင် တစ်ခုတည်း ကျန်ရှိတော့သည့် စစ်ကောင်စီ၏ ခြေလျင်တပ်ရင်း ခ.လ.ရ – ၂၇၄ တပ်ကို ချင်းညီနောင်နှင့် မဟာမိတ် ပူးပေါင်းတပ်ဖွဲ့ဝင်တို့သည် ယခုနှစ် နိုဝင်ဘာလ ၉ ရက်မှ စတင်တိုက်ခိုက်ခဲ့ပြီး ရက်ပေါင်း ၄၂ ရက်ကြာ တိုက်ခိုက်ပြီးနောက် နိုဝင်ဘာ ၂၁ ရက်က မင်းတပ်မြို့ တစ်ခုလုံးကို အပြီးသတ် သိမ်းပိုက်နိုင်ခြင်းဖြစ်သည်။
