သံလွင်ခက်
ဒီဇင်ဘာ ၉၊ ၂၀၂၄။
မန္တလေးတိုင်း မတ္တရာမြို့နယ် အနောက်ဘက်ခြမ်းရှိ တော်လှန်ရေးတပ်ဖွဲ့များ ခေတ္တလက်လွှတ်ခဲ့ရသော ကျေးရွာများကို ပြန်လည်သိမ်းပိုက်နိုင်ခဲ့ပြီဖြစ်သည်ဟု ပြည်သူ့ကာကွယ်ရေးတပ်မတော် (မန္တလေး)-MDY-PDF က ယနေ့နံနက်တွင် ထုတ်ပြန်သည်။
ပြီးခဲ့သည့် ဒီဇင်ဘာ ၆ ရက်တွင် မတ္တရာမြို့နယ် အနောက်ဘက်ခြမ်းရှိ ရွာသစ်ကျေးရွာ၊ ဝန်စုကျေးရွာနှင့် ထိန်ပင်စောက်ကျေးရွာတို့ကို ပြန်လည်ထိုးစစ်ဆင်ကာ အပြီးသတ် သိမ်းပိုက်နိုင်ခဲ့ခြင်းဖြစ်သည်။
အဆိုပါ တိုက်ပွဲအတွင်း စစ်ကောင်စီတပ်ဖွဲ့ထံမှ လက်နက်ခဲယမ်းအချို့ကိုလည်း သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားသည်။
အင်ကြင်းမြိုင်ကျေးရွာအခြေစိုက် ၁၀၁၄ လေကြောင်းရန်ကာကွယ်ရေးတပ်စခန်းအပါအဝင် မတ္တရာမြို့နယ်အတွင်းရှိ ငါးလုံးပြွန်ကျေးရွာ တပ်စခန်း ၊ တောင်ကန်ကျေးရွာ တပ်စခန်း ၊ အောင်သပြေကျေးရွာ တပ်စခန်းတို့အပြင် စစ်ကောင်စီတပ်စခန်း ၃၅ ခုကို သိမ်းပိုက်ခဲ့သည်ဟု ဇူလိုင် ၃၁ ရက်တွင် MDF-PDF က ထုတ်ပြန်ထားသည်။
မတ္တရာမြို့နယ်အတွင်းရှိ လက်လွှတ်လိုက်ရသော တပ်စခန်းများကို စစ်ကောင်စီတပ်က ကြည်း၊ရေ၊လေတပ်တို့သုံးကာ နည်းလမ်းမျိုးစုံဖြင့် ပြန်လည်ထိုးစစ်ဆင်ခဲ့ရာ ပြီးခဲ့သည့် နိုဝင်ဘာလကုန်ပိုင်းတွင် တော်လှန်ရေးတပ်ဖွဲ့များက ပြန်လည်ဆုတ်ခွာခဲ့ရသည်။
ပုံစာ-မတ္တရာမြို့နယ်အတွင်းရှိ စစ်ကောင်စီတပ်စခန်းများကို ပြီးခဲ့သည့် ဇူလိုင်လတွင် MDF-PDF က သိမ်းပိုက်စဉ်။
ဓာတ်ပုံ-MDY-PDF
