မောင်ဘဦး
အောက်တိုဘာ ၅၊ ၂၀၂၄။
စစ်ကိုင်းတိုင်း၊ ယင်းမာပင်ခရိုင်က ယင်းမာပင်-ဆားလင်းကြီးရွာပေါင်းစုံသပိတ်ကော်မတီဝင် ကိုကျော်ဝင်းအောင်သည် ယနေ့အောက်တိုဘာ ၅ ရက်၊ နံနက် ၅ း ၄၅ အချိန်တွင် ရုတ်တရက်အမောဖောက်ပြီး ကွယ်လွန်ခဲ့သည်ဟု နီးစပ်သူများထံမှသိရသည်။
အသက် ၄၁ နှစ်အရွယ်ရှိ ကွယ်လွန်သူ ကိုကျော်ဝင်းအောင်သည် နှလုံးသွေးကြောကျဉ်းနှင့် သွေးတိုးရောဂါအခံရှိသည်ဟု သိရသည်။
၎င်း၏ ဈာပနအခမ်းအနားကို ယနေ့နံနက် ၁၁ နာရီတွင် ယင်းမာပင်မြို့နယ်တစ်နေရာ၌ ပြုလုပ်ခဲ့ပြီး ရုပ်အလောင်းကို မီးသဂြိုလ်ခဲ့သည်ဟု သိရသည်။
“သူသေဆုံးတဲ့အတွက် စိတ်မကောင်းအလွန်ဖြစ်ရတယ်။ သူက သပိတ်အပြင် အခြားလူသားစာနာလုပ်ငန်းတွေလည်း နိုင်သလောက်လုပ်တယ်” ဟု ယင်းပင်-ဆားလင်းကြီးရွာပေါင်းစုံသပိတ်ကော်မတီ၏ ပြန်ကြားရေးတာဝန်ခံက ပြောသည်။
ကိုကျော်ဝင်းအောင်သည် ပြီးခဲ့သည့် ၂၀၂၁ ခုနှစ် ၅ လပိုင်းတွင် ယင်းမာပင်-ဆားလင်းကြီးရွာပေါင်းစုံသပိတ်တွင် ကော်မတီဝင်အဖြစ်ပါဝင်ပူးပေါင်းခဲ့ပြီး အခြားတော်လှန်ရေးလုပ်ငန်းများကိုလည်း လုပ်ဆောင်ခဲ့သည်ဟု သိရသည်။
