ထွယ်
အောက်တိုဘာ ၂၊ ၂၀၂၄။
ကချင်လွတ်မြောက်ရေးတပ်မတော် – KIA ပူးပေါင်းတပ်များက ၇ လအတွင်း ကချင်ပြည်နယ်အတွင်းရှိ ချီဖွေ နှင့် ဆော့လော်အပါအဝင် မြို့နယ် ၅ ခုကို သိမ်းပိုက်ထားနိုင်သည်။
စက်တင်ဘာ ၂၉ ရက်ကစ၍ ၄ ရက်တာ တိုက်ပွဲဖြစ်ပွားပြီးနောက် ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်သည် ကချင်ပြည်နယ် အရှေ့မြောက်ဘက်ခြမ်းရှိ မြို့နယ် နှစ်ခုကို တိုက်ခိုက် သိမ်းပိုက်နိုင်ခဲ့သည်။
စစ်ကောင်စီတပ်ဖွဲ့ဝင်များနှင့်အတူ ၎င်း၏ လက်အောက်ခံတပ်ဖွဲ့ဖြစ်သော ဇခုန်တိန်ယိမ်း ဦးဆောင်သည့် ကချင်ဒီမိုကရေစီသစ် တပ်မတော် (NDAK) နယ်ခြားစောင့်တပ် – BGF အပါအဝင် လဆန်အောင်ဝါ ဦးဆောင်သည့် ပြည်သူ့စစ် – P.T.Ts တို့ တပ်စွဲသည့်နေရာများဖြစ်သည့် ချီဖွေမြို့နယ်နှင့် ဆော့လော်မြို့နယ်ကို တိုက်ခိုက်သိမ်းပိုက်နိုင်ခဲ့ခြင်းဖြစ်သည်။
အဆိုပါ ချီဖွေခရိုင်တွင် စက်တင်ဘာလ ၂၉ ရက်နေ့ နံနက် ၅ နာရီခန့်ကတည်းက တိုက်ပွဲဖြစ်ပွားခဲ့ခြင်းဖြစ်ပြီး အဆိုပါနေ့ကပင် ချီဖွေမြို့ကို တိုက်ခိုက်သိမ်းပိုက်နိုင်ခဲ့ပြီး ယနေ့နံနက် ၇ နာရီခန့်တွင် ဆော့လော်မြို့ရှိ စစ်ကောင်စီတပ်၏ ဗျူဟာကုန်းကို အပြီးတိုင်တိုက်ခိုက်သိမ်းပိုက်နိုင်ခဲ့သည်ဟု KIO ပြန်ကြားရေးတာဝန်ခံ ဗိုလ်မှူးကြီး ဦးနော်ဘူ က သံလွင်ခက်ကို ပြောသည်။
“ဆော့လော်သိမ်းပေးလိုက်ရင် ကျန်တဲ့စခန်းတွေက နေလို့ မရတော့ဘူး သန့်ပြီလို့ ပြောလို့ရတာပေါ့။ ချီဖွေလည်း အကုန်ရပြီ၊ ဆော့လော်လည်း ရပြီဆိုတော့ ၂ မြို့နယ်လုံး ရပြီလို့ ပြောလို့ရပါတယ်” ဟု ပြောသည်။
ချီဖွေမြို့မှ မိုင် ၄၀ အကွာတွင် တည်ရှိပြီး မြို့နယ်ခွဲတစ်ခုဖြစ်သော ဇခုန်တိန်ယိမ်း ဦးဆောင်သည့် နယ်ခြားစောင့်တပ်ဖွဲ့များရှိရာ ပန်ဝါမြို့ ကျန်ရှိနေသေးသည်ဟု ဗိုလ်မှူးကြီး ဦးနော်ဘူထံက သိရသည်။
ယခုနှစ် မတ်လ ၇ ရက်က စတင်ခဲ့သည့် ကချင်ထိုးစစ်သည် ၇ လခန့်ကြာပြီးနောက် မြစ်ကြီးနားခရိုင်အတွင်းရှိ အင်ဂျန်းယန်မြို့နယ်၊ ပူတာာအို ခရိုင်အတွင်းရှိ ဆွမ်ပရာဘွမ်မြို့နယ်နှင့် ဗန်းမော်ခရိုင်အတွင်းရှိ မိုးမောက်မြို့နယ် အပါအဝင် ချီဖွေခရိုင်အတွင်းရှိ ချီဖွေမြို့နယ်နှင့် ဆော့လော်မြို့နယ်များဖြစ်ကြသည့် မြို့နယ် ၅ ခုကို သိမ်းပိုက်ထားနိုင်ခဲ့ခြင်းဖြစ်သည်။
ပုံစာ – KIA တပ်ဖွဲ့ဝင် တချို့။
