ရိုဟင်ဂျာများနေရပ်ပြန်ရေးကသာ တစ်ခုတည်းသောအဖြေ ဟု ဘင်္ဂလားဒေ့ရှ်နိုင်ငံခြားရေးဝန်ကြီးပြော
*******
သံလွင်ခက်
မေ ၂၀၊ ၂၀၂၄။
နိုင်ငံသားအခွင့်အရေးနှင့် ဂုဏ်သိက္ခာရှိရှိနေရပ်ပြန်ရေးကသာ လက်ရှိကြုံနေရသော ရိုဟင်ဂျာအကြပ်အတည်းအတွက် နောက်ဆုံးဖြေရှင်းချက်ဖြစ်ပြီး ဒေသတွင်းအင်အားကြီးနိုင်ငံများဖြစ်ကြသည့် တရုတ်နှင့် အိန္ဒိယက အဆိုပါ အကြပ်အတည်းအား စေ့စပ်ဆွေးနွေးရေးနည်းလမ်းဖြင့်ဖြေရှင်းပေးရန် အရေးကြီးသည်ဟု ဘင်္ဂလားဒေ့ရှ်နိုင်ငံခြားရေးဝန်ကြီး ဒေါက်တာ ဟာဆန် မာမွတ် က ယမန်နေ့ကပြောကြားလိုက်သည်။
“နေရပ်ပြန်ရေးကသာ တစ်ခုတည်းသောအဖြေပဲ” ဟု ဘင်္ဂလားဒေ့ရှ်နိုင်ငံ၊ နိုင်ငံရပ်ခြားသတင်းထောက်များအသင်း – OCAB ကကျင်းပသော ရိုဟင်ဂျာအကြပ်အတည်းဆိုင်ရာဆွေးနွေးပွဲတွင် ၎င်းက ပြောကြားခဲ့ခြင်းဖြစ်သည်။
တဆက်တည်းမှာပင် ၎င်းက “အိန္ဒိယနဲ့ တရုတ်တို့လို ဒေသတွင်းအင်အားကြီးနိုင်ငံတွေရဲ့အခန်းကဏ္ဍက အရေးကြီးပါတယ်။ သူတို့ကသာဖြေရှင်းပေးမယ်ဆိုရင် ဒီအကြပ်အတည်းကြီးပြေလည်မယ်လို့လည်း ကျွန်တော်တို့ယုံကြည်ပါတယ်”ဟုပြောသည်။
လက်ရှိဒုက္ခသည်စခန်းများတွင်နေထိုင်နေကြသော ရိုဟင်ဂျာများ၏ လိုအပ် ချက်များအား ဖြည့်ဆည်းပေးနေခြင်းနှင့် တတိယနိုင်ငံများဆီပို့ဆောင်ပေးခြင်းက အကြပ်အတည်းကိုပြေလည်စေမည့်နည်းလမ်းမဟုတ်ဟုလည်း ဟာဆန် ကပြောသည်။
ရာဂဏန်းမျှသောရိုဟင်ဂျာတို့အား အနောက်နိုင်ငံများအပါအဝင် တတိယနိုင်ငံကိုပို့ဆောင်ပေးခဲ့သည်ဟု ဘင်္ဂလားဒေ့ရှ်နိုင်ငံခြားရေးဝန်ကြီးရုံးအရာရှိများကပြောဆိုနေကြသော်လည်း အဆိုပါပြောဆိုမှုများက ရိုဟင်ဂျာများအတွက် မှားယွင်းသောသတင်းစကားများဖြစ်နိုင်ကြောင်းနှင့် ၎င်းတို့နေရပ်ဖြစ်သည့် ရခိုင်ပြည်နယ်ပြန်ရန် အခွင့်အရေးများဆုံးရှုံးသွားနိုင်ကြောင်း ၎င်းကဆိုသည်။
ကမ္ဘာလုံးဆိုင်ရာဖိအားများနှင့်ရင်ဆိုင်နေရသော မြန်မာအာဏာပိုင်များက ဖိအားများလျှော့ချရန်အတွက် ရိုဟင်ဂျာများနေရပ်ပြန်ပို့ရေးလုပ်ငန်းစဥ်ကိုစတင်ရန် ဆန္ဒရှိနေသည်ဟုလည်း ဟာဆန် က အဆိုပါအခမ်းအနားတွင်ပြော ကြားခဲ့သည်။
ရခိုင်ပြည်နယ်တွင် ၂၀၁၇ ခုနှစ် စစ်တပ်၏အကြမ်းဖက်ဖြိုခွင်းမှုများကြောင့် ရိုဟင်ဂျာ ၇၀၀,၀၀၀ နီးပါး ဘင်္ဂလားဒေ့ရှ်နိုင်ငံကို ထွက်ပြေးလာခဲ့ကြသည်။
ဘင်္ဂလားဒေ့ရှ်ဝန်ကြီးချုပ် ဟာဆီနာ ကလည်း နယ်စပ်ဂိတ်ကိုဖွင့်ပေးခဲ့ပြီး ရိုဟင်ဂျာများအား ဘင်္ဂလားဒေ့ရှ်နိုင်ငံတွင်း ဝင်ရောက်ခွင့်ပြုခဲ့သည်။
“လက်ရှိအချိန်မှာတော့ ကော့ဘဇားရိုဟင်ဂျာဒုက္ခသည်စခန်းတွေမှာ ရိုဟင်ဂျာ ၁ ဒဿမ ၃ သန်းနီးပါးရှိနေပြီ”ဟု နိုင်ငံခြားရေးဝန်ကြီးကဆိုသည်။
ရိုဟင်ဂျာများအတွက် နိုင်ငံတကာ၏ထောက်ပံ့နေမှုများ ယမန်နှစ်က လျော့ကျသွားခဲ့သော်လည်း ယခုနှစ်အတွင်း ပြန်လည်တိုးလာမည်ဟုမျှော်လင့်ရကြောင်းနှင့် အဆိုပါရန်ပုံငွေများအား ပွင့်လင်းမြင်သာစွာအသုံးပြုသွားမည်ဟုလည်း ၎င်းကဆိုသည်။
Ref: Dhaka Tribune
ဓာတ်ပုံ – Dhaka Tribune
ပုံစာ – ကော့ဘဇားရှိ ရိုဟင်ဂျာဒုက္ခသည်စခန်း။
မှတ်ချက်။ ။ မူရင်းသတင်းအရေးအသားအတိုင်း ရိုဟင်ဂျာ ဟုသုံးနှုန်းပြီး ဘာသာပြန်ဆိုထားပါသည်။
